漂泊中的魚

 

最近天氣很不穩定, 相約了朋友們的戶外活動, 都似乎在出發與取消之間 …

本來打算跟朋友們 Weekend 去行山, 結果當天早上取消了, 卻有見天氣不太差, 我就獨自一個人出門走走.

最初的計劃只是由沙田行去馬鞍山而已, 反正就是沿著城門河而行, 全平路, 冇難度 !

其實 … 住在係度咁耐, 都唔知行去馬鞍山要幾耐, 咁行一次咪會知囉 ~~

 

 

剛好遇上了有人在操龍, 突然驚覺 : 係喎 ! 就黎端午節啦喎 !

話時話, 咁多野玩過, 就係未玩過龍舟, 但係聽說太多操龍好鬼攰, 興趣真係麻麻 … …

 

話咁快就行到入去馬鞍山囉, 原來一個鐘就搞掂架啦, 咁近而且都幾好行 ~~

 

 

不過 … 我行到馬鞍山海濱長廊的一半左右, 都係覺得唔係咁夠.

把心一橫, 我決定轉向恒安村而行, 往上馬鞍山方向走 …

只要沿著馬鞍山村路, 就可以直達馬鞍山燒烤場架啦 ~

(唉 … 都唔知呢個決定係好定壞啦 !)

 

馬鞍山燒烤場之後, 其實係仲有路伸延下去的, 只要依馬鞍山郊遊徑便可.

我第一回上到黎, 決定順道去埋馬鞍山村, 參觀一下那個由信義會活化而設立的鞍山探索館.

結果 … 出事啦 ~~~

我行錯左去分支路, 上山上到一半之時剛好來到某間民房的後園, 還未走近就在三隻大狗邊吠邊衝出黎, 而且真係衝埋黎我身邊.

嚇得我即刻企定與之對峙, 因為我直覺知道只要我轉身走的話, 佢地就會咬我架啦 !

我地一人三狗, 就係大狗邊吠邊兇我, 以及 我邊喝邊後退之間, 我終於成功都全身而退, 不過真係嚇出一身汗 … …

 

下山回到分支路, 驚魂甫定的我仍然未死心, 再次沿馬鞍山郊遊徑而行, 直至見到相二中的涼亭 及 相三中的易拉架 !

黎到呢個位, 就係馬鞍山村的入口了 ~

 

馬鞍山村的風景 !

呢度的環境幾唔錯架喎, 似乎很與世隔絕, 原來呢度以前都幾自給自足的架 !

 

係喎, 大家知唔知馬鞍山村的村民. 以前係以咩為生架 ?!

唔知 ?! 咁你地真係要黎呢個鞍山探索館逛逛了 ~

鞍山探索館 Webpage : http://service.elchk.org.hk/unit_service5.php

鞍山探索館 Facebook : https://www.facebook.com/elchkgyc

 

其實馬鞍山以往係一個礦場, 礦工們開始聚居在這裡, 齊齊搭建房屋, 慢慢型成了一個村落.

不過隨著礦場在 1976 年關閉之後, 村民都開始搬離了馬鞍山村, 結果村中的學校就停辦了.

近年才由信義會進行活化, 將 3 橦舊樓房翻新活化, 亦是這天我參觀了的部份.

大家若想知道多些馬鞍山村的資料, 就去報名參加由信義會舉行的導賞團吧 ~

(我去年報了名, 可惜剛好遇上暴雨取消, 卻自此没空再聯絡補回名額, 希望今年有時間再報過 … )

 

 

這信義學校原本就是村中的小學, 如今則改建成宿舍 (基督教香港信義會恩青營)

難得到來, 只有我一個遊人, 職員很友好的帶我進去參觀, 環境唔錯架, 可惜宿營床位暫時只限教會 / 相關團體租用.

這小小的營房, 不知為何看上去帶點可愛 …

 

 

這探索館還有一個部份 – 礦工 Cafe !

哈 ! 邊會諗到上左山都真係有咖啡飲架呢 ~~~

我好鍾意佢牆上的礦洞壁畫, 好得意架 !

 

 

村中的風景, 看到山上那舊教堂嘛 ?!

這邊的探索館是被列為三級歷史建築, 而那舊教堂則是被列為二級歷史建築 !

還有旁邊的兩橦樓房, 都是舊校舍來的.

 

 

好吧 ! 目的達到, 可以回程了.

是日全程走了 14 公里左右, 前前後後花了 3 個小時左右啦, 夠晒啦 ~

由馬鞍山村呢度可以再出發上山, 先登昂平再行去西貢架, 不過留番下回先再行吧 !

 

呢排好鍾意行城門河, 早幾日影的夜景相都分享埋先 !