當我地完成左係神子元的最後一潛, 於潛店吃過午飯, 就速速回到民宿, 作最後之行李收拾.
多得朋友們開車送我們到伊豆急下田車站, 又剛好買到了餘數不多的伊豆急行列車回東京.
早點回到東京, 我們就可以有多點時間於東京飲飲食食嘛 ~
登上了列車, 可以好好享用一下便利店買來的甜店 !
接著 … 我忍不住睡意下 … 小睡了一會 …
間中醒過來嘛, 又見到窗外不錯的風景, 就拿起相機拍下.
比較了坐鐵路 及 自駕的經驗, 覺得鐵路比自駕來得輕鬆及快速 (因為開車會堵車), 沿途風景相差不遠, 唯獨在南伊豆没車就較不方便 ~
話咁快就回到東京了 !
我應該從未有到過東京車站, 整座建築物之外表都真係幾靚喎 ~
未來的 24 小時, 我們就會在這附近渡過東京的一天遊 !
由於對住宿没什要求, 而要於東京車站附近找平價住宿, 也不太容易, 今回找來一家頗為不錯的酒店 “スーパーホテル Lohas東京駅八重洲中央口”
這家 Hotel 給我的第一印象非常的好, 主因是為我 check in 的職員, 其態度令人覺得很舒服.
操流利英文, 没有日本人一向的職業性笑容, 卻又會帶點熱情而有禮, 還為我們介紹得很周詳.
上到房間, 地方是有點小, 這本就是東京酒店的通病, 房間很整潔, 還附有浴衣 及 沖涼包.
原以為這酒店設有大浴堂, 房間內就没有沖涼設備, 原來廁所花洒皆齊備 !
最有趣的是, 可以到大堂的 Pillow Room 找個合用的枕頭, 再帶回房中訓下 … …
スーパーホテル Lohas東京駅八重洲中央口 Webpage : http://www.superhotel.co.jp/s_hotels/yaesu/
住呢間酒店就係方便在, 只要行出大馬路, 對面就已經係東京車站, 以位置來說真的非常方便 !
吃個晚飯也不用走遠, 就去了朋友介紹, 算頗有名氣的伊達の牛, 一人來一份燒牛舌定食.
呢份牛舌定食真係幾唔錯, 但相中那個尤如雞肉棒的東東仲好味呀 !!
星期天的晚上, 日本店舖都會早點打烊, 我們隨意在地下街逛來逛去, 見到合心水的手信就買下.
無意中逛到地中街的某區, 原來是動漫區來的, 很多不同出名的卡通人物, 都在這裡開了一家精品店, 以賺取旅客們的一部份旅費 !
晚上去到這區, 大部份的店舖已關, 結果第二天我們再重遊此地, 真係幾睇到眼花聊亂架 ~
PS : 本來見到 Winnie the pooh 90 周年紀念 pop up store, 期待會售賣一些特別版紀念品, 點知 … 算把啦 ~
旅程最後一天, 都未到凌晨 3 點, 我們就已經要起床了.
我們想早點到築地漁市場, 爭取那很難才可以得到的 120 個名額, 怎料 … … 3:25 AM 前行到築地漁市場, 卻被告知名額一早派完了 ….
唔係呀嘛 ?! 5:00 AM 先開始的拍賣會, 洗唔洗早到咁黎搶呀 ?! 唔通真係要通宵排隊先可以 ?!
失望哦 … … … …
失望而回, 卻又無理由白走一趟, 那我們就夜遊築地市場吧 ~
晚上的築地市場, 跟白天很不一樣, 相比起白天的人擠人狀, 這回多了點平靜, 反而令人有心機慢慢去逛 ~
這裡有些店家非常勤力, 可能是已經工作了 24 小時的樣子, 同時也有些晨早 3 點多就來開舖, 因此都幾多野睇 !
很可惜哦, 很想很想看吞拿魚拍賣的我, 還是失去了機會 !!!
本來說好了要十一月搬遷的築地市場, 搬遷日似乎要再次被推遲, 據聞是跟新地點水源被染污有關吧 ?
這個地方本就是東京歷史的一部份, 要被遷移及拆掉, 還真有點可惜呢 ?! 果然奧運大過天了 !
眼看天色尚早, 又未吃早餐, 那就選了其中一家壽司店來排下隊, 點知我地竟然係排左去 有築地第一名店之 “壽司大” !
就因為一個無意的舉動, 我們開始了那長達 4 小時的等候 !
於排隊期間, 我跟朋友輪流對換, 他在排隊時, 我就可以在築地市場內四處亂逛.
唔留意唔知, 築地市場呢度可算係一個戰場黎架, 一個由多架快速而小型的拖拉車所型成的交通網.
遊客們只要站到馬路中, 就得打醒十二分精神, 免得一個不小心被左穿右插的拖拉車撞倒了.
這地馬路路況有點難走, 駕駛者卻總算是熟手技工, 總能及時避開遊人們.
而輪到我去排隊之時, 真係冇咩好做, 咪係築地市場內捉鯉魚皇囉 …. (超無聊的活動, 玩起 Pokemon 來 …) , 直到見到天慢慢亮起來 ~
築地漁市場內的不同貨品, 除左海鮮, 還有乾貨同蔬果 !
不過最吸引, 還是魚生 及 各式食品 !!
壽司大的營業時間為 0500 – 1400, 不過當日我排到 7 點多左右, 就已經見到截龍個牌出現了 !
嘩 … 實在太誇張了 ?! 仍然在排緊隊之時, 我不禁問左句, 係咪真係咁好食呀 ?!
由 4:30am 開始排隊, 我們終於係 8:30am 之時, 成功入到壽司大了 !!
足足排左 4 個小時哦 !!
入到去就知點解要排咁耐, 全店只有大約 14 個座位, 根據坐位位置, 分別由 3 位師傳去招待.
師傅就會依各客人的進食速度, 每回一件咁整好再放上壽司板上, 以一 set 十件來說, 每人起碼要坐上 30 – 40 份鐘去享用這個套餐, 咁就會明白點解大家要排咁耐啦 ~
開餐之前, 先來一碗鮮味十足的麵豉湯 !
一 set 十件唔再獨立介紹, 每一件都由師傅主理, 頭九件由師傅話事, 最後一件可以係 Menu 上選 !
每件壽司師傅都會先調好味的, 基本上唔洗自己再加豉油, 要加的話師傅都會提你.
每一件上枱之時, 看到都會有 “嘩 !” 一聲, 忍唔住要放入口中, 咀嚼時回味不斷, 有種唔捨得吞的感覺, 總之就係很有水準啦 !
基本上我同朋友都係唔會為餐廳而排隊的人, 今回排左 4 小時都非常破我們的例, 朋友問我覺得呢一餐值唔值呢 4 小時, 我會答 “值 !” ; 但你問我會唔會再排, 我就應該唔會啦 !
壽司大, 唔洗問我位置, 只要見到人龍自然會搵到, 有縁者 (即唔洗點排的話) 定必一試 !!
由築地市場回到酒店, 實在忍不住回酒店小睡片刻, 直到 check out 時間到了, 我們才再次出動 !
今回我們近近地, 去左由舊東京中央郵局大樓改建而成的 Shopping Mall – KITTE !
呢座大樓的地下, 就係東京中央郵便局, 如果想買郵票 及 Postcard, 記得要入去逛逛 ~
而我地嘛 … 竟然又係為左食, 冇法 … 一見到佢門口放左張 蜜桃芭菲杯, 就令人忍唔住入去幫襯, 邪惡的千疋屋 (SEMBIKIYA)
可以咁講, 入到去求其點一份水果甜點, 我相信大家都唔會點失望 !!
千疋屋 Webpage : http://www.sembikiya.co.jp/
KITTE 設有觀景台, 可以欣賞到舊東京車站的全景, 在石屎森林中, 這座歐洲式建築真係突出又有型架 !
成朝都係食埋晒 D 生冷野, 離開前真係要食番碗拉麵暖暖肚.
係地下街有一角, 就係拉麵一條街, 求其搵間唔洗排隊的, 都應該會好好食 !
呢間都唔錯, 但個可樂餅仲好味 !!
嘩 ! 好好彩, 入左車站仲俾我地見到 Finding Dory 的精品小檔, 呢下仲唔破產 !?
結果我們作出最後之血拼, 買了一大袋離開 ~
坐上了 Narita Express, 安安樂樂地一程車坐到去機場 … …
上機前仲有時間係吉野家食番個晚飯 !
呢間吉野家, 竟然有鰻魚飯 同 炸豬扒飯, 超掂又抵食, 呢回仲唔係飽住咁走 ?!
上了機, 陪隨著是難得的 Magic Hour, 這回的日本之旅算是半完滿地完成.
放心 ! 我係呢個旅程不久, 又再次飛左去日本啦 ~
下回的旅程更精彩, 完成了有一種完成目標之一的感受, 我留待下回分享 !
