早排由朋友安排之下, 我地竟然喺 HK 都可以學到點做魚拓, 非常有趣的一個技術 !!
我諗我第一次見識魚拓, 應該就係去日本旅行之時, 店主的作品大大張掛喺牆上, 成間房即刻有型晒架喎 ~
工作坊開始之前, 我地先同駐場貓貓交流下先 !
今回工作坊係由支持環保海鮮的 Choose Right Today (識揀海鮮) 安排, 大會先講解一下環保海鮮呢個概念, 而令人估唔到的是 HK 人食用海鮮的數量, 竟然排全球第二, 緊次於海島國家 Maldives !
至於點解海鮮都要選取環保海鮮呢 ? 理由好簡單, 無止境咁食用各式海鮮, 就有機會因為採捕過度而令物種滅絕, 事實上各類海鮮都有潛在的食用風險, 而香港暫時對入口海鮮係未有要求提供清晰的入口資料架喎, 咁就形成左某程度之食用風險了 !
無論野生 與 養殖 的海鮮, 都唔一定係環保海鮮, 兩者各有要考慮的因素 …
如果想知道多點 環保海鮮 的資訊, 可以參考以下網站 : https://www.chooserighttoday.org/
今回由 香港魚拓 教我地如何制作魚拓 !
現場睇咗佢地的作品, 就覺得好鬼有 style, 但到我地真係落手落腳去做時, 先知原來要拓得出一條完整的魚, 係一點都唔容易架 !
今回選取左 2 款較清晰魚鱗的食用魚 : 新鮮的 烏頭 & 鯪魚 !
準備之初, 先將魚身抹乾淨並放好位置, 盡量拉開魚鰭 …
位置準確就可以為魚掃上墨汁, 要將魚身完全變黑 … 立即變黑, 但眼仔 記得留白哦 !
接住要墨汁乾透之前, 喺魚身舖上魚拓紙, 並用雙手慢慢將逐個部份的細節掃印出黎 !
呢個部驟非常困難, 太大力又驚會化開, 太細力又印唔出, 又驚摸下摸下會成條歪左, 立體物品要轉化於紙上, 其實都真係好有難度, 仲要條魚有咁鬼多魚鰭喎 !!
上邊條鯪魚由導師示範, 而我就去試玩烏頭啦 ~
玩多幾下又有導師幫拖, 都勉強整好左 1 條魚拓出黎架 …
大家齊齊專心地玩魚拓, 慢慢就出現左唔同的作品嗽 !
