Day 2, 一大早起身, 望向窗外就見個美麗海景, 一個平靜如湖的海呀 !! 我地急不及待咁梳洗好, 襯食早餐前, 衝到海邊散個步, 雖然只係一個石灘, 但見到水清見底的海邊, 再加上個藍天 .... 嘩 ~ 我的旅程終於開始啦 !! 係呀, 真係到呢一刻先覺係去緊旅行, Day 1 只係覺舟車勞動, 開到架車(左軚的)去到 Hotel 都黑麻麻囉, 鬼知有冇海咩 ~
早餐簡簡單單, 有Breakfast cereals, 面包, 芝士, 火腿, 值得一提個牛角包, 真係非常巨型但好鬆軟, 配上果汁 or 怪怪的咖啡 (成個 Croatia 之旅, 由 Hotel 到餐廳 再到 cafe, 賣o個杯 Cappa 都係怪怪架, 又苦又冇乜咖啡味... 可算是呢個國家美中不足之一的地方 !). 食過早餐, 又邊同四葉妹妹影夠相之後, 我地就開車去成個旅程第一個景點 - Krka National Park.
沿海邊慢慢開車往南走 to Sibenik, 再穿番入內陸, 呢個 National Park 有好幾個入口, 而我地決定去其中一個小 Town - Skradin, 先泊好架車, 再轉坐小船入 National Park. 我地停好車之後, 就打算搵下去邊買飛, 左搵右搵都唔知去邊問, 我就打算o係碼頭搵個人問下, 結果我睇中左一個著有 National Park Logo Tee 的男人, 一問之下, 原來坐船係唔洗錢, 但入到 National Park 就要買飛入場啦 ...
由於小船每小時一班, 撘半開出, 仲有時間俾我地係 Skradin 呢個小 Town 入面轉轉. Skradin 作為一個 National Park 的入口, 頗為商業化, 有好幾間 Cafe / Pub / 小店開正o係海邊同小廣場, 可能時間尚早 or 當地旅遊 peak season 尚未到, 遊人並不多, 當走到入 Town 的內圍, 人流就更少了, 感覺到非常安寧.
當地的房屋新舊參半, 望見剛剛翻新過的大屋的同時, 旁邊又會找到殘舊的農村小屋, 但總括黎講係修飾得非常整齊, 街道亦被收拾得非常乾淨. 旅遊書上寫, Croatia 大約 10 年前左右先結束內戰, 大城小 town 尚在重建之中, 當地人有錢後的第一件事係翻新房屋, 但係呢度同時有另一樣副產品, 就係當佢地投資錯誤, 資金不足之時, 就會出現中國常見的物體 - 爛尾樓 !
時間夠喇 ! 我地走向碼頭準備上船 (上船前, 我地見到一橦新式玻璃建築物, 係 National Park 的 Info Centre, 所以我地順手買埋飛啦 ~), 到呢刻先發現, 遊人的數量竟然塞滿整條船, 呢堆人係邊度走出黎架, 頭先明明冇咁多人架 ?! 我地係 open deck 找到 2 個位置, 坐低晒住太陽, 開始享受呢一個 20 mins, 沿途風景優美的船程喇 !!
