最近 join 左個本地線上越野跑, 要一連玩足 3 個月, 每月要到大會指定的香港主要山徑儲哩數, 11 月就讓我們從衞奕信徑開始吧 !
我哋呢個月分左 2 次去完成哩數, 第一回係衛徑四 & 五段 ; 第二回係甘甘地的衛徑八 & 九段 !
Part 1: 衛徑第四段起點, 就由井欄樹出發, 一路向東洋山進發 ! 我都有好一陣子冇去行呢段山徑, 每之走在山林中, 景色依然優美, 不過上東洋山的石級依舊有點甘 ~~
東洋山上好風景, 可遠眺整個西貢, 又可以睇到呢期人人都話要去睇的芒草 !
曾幾何時, 東洋山上並沒有太多遊人, 我地可以安坐山頂看日落, 如今則是人山人海的打卡熱點 !
多走幾步轉多個彎, 我們來到了飛鵝山上, 這邊得到不一樣的城市好風景, 整個九龍就在腳下 …
接上衛徑第五段之前, 我哋竟然可以喺呢間士多食得番碗豆花, 好幸福呀 (山友們應該知道咩事啦 ~) !!
其實衛五主要沿著引水道而行, 路途平坦而簡單, 不過對我地黎講就係有點點悶囉 ~~
不過估唔到黃昏日落的引水道, 都可以係幾靚架喎 !
Part 2 : 衛徑第八段中, 我地由太和火車站起步, 向九龍坑山而行, 就是延綿不盡的上山路段 !
明明已是 11 月中旬, 可是日天氣仍異常炎熱 (印象是高達 30 度), 我們還真要留一留力, 以免未到黃嶺就開始 overheat 啦 !
石級接石級的山徑, 識行其實就好好行 (如果唔係咁熱的話), 而且這裡視野很廣濶 !
中途我地離一離開左衛徑, 轉路去沙螺洞的士多, 先吃個豆花補給一下體力, 順道再補些額外水份 / 飲品, 才可以再次上山往八仙嶺 ~~
這天的天氣, 熱得實在不宜過量運動, 我們曾遇上快要脫水的跑山人, 也遇過跌傷了的遊人, 後來還有在老抽的山友, 似乎是日意外頻生咁喎 !
由這裡開始, 我們可以接回衛徑第九段, 一路無間斷地往山上走去, 直至我們來到屏風山 !
藍天白雲確係會令人感覺愉快, 但若當天氣溫早已高企, 那我們要用上怎樣強大的意志, 努力地去走完全程呢 ?!
途上遇到的小傢伙, 看上去一點也不怕生, 倒也很吸引我們的相機 !
不用多去介紹, 不少山友對八仙嶺又愛又恨的中途點 : 總會令人進退不得的黃嶺 !
開始進入倒數, 八仙嶺就在我們眼前 !
隨著走過一個山峰又一個山峰, 日光漸退, 山下是日落前的風景 ~
呢幾張山脈相片, 靚到令我忍唔住要 share 下出黎喎 !
單單一口氣走完那八個已被命名的山頭, 我們就已有鬆一口氣的錯覺, 畢竟我們都已走了大半天的山路了 ~~
從仙姑峰下山後, 走了一會兒山腰路線, 卻剛好遇上了封路, 幸得附近阿姐告知, 前方山徑有輕微山泥傾瀉, 路是半封閉式, 只要快速通過即可, 咁我地就順順利利咁天黑前完成了 ~~
