初三的早上, 我開左架車入東涌, 今日約左一班親戚一齊入大嶼山食齋.
一朝早的東涌十分清靜, 昂平 360 亦未見人潮 (嘩! 回程時見到條人龍好長呀, 之後係新聞報導話車票提前售罄添, 呵! 早知我都去玩下啦 ~), 係11 號大嶼山巴士站等齊人, 一行13人就出發, 先去觀音寺走走, 影下相, 跟住 11 點左右再去靈隱寺食齋.
好耐冇坐大嶼山巴士啦, 巴士感覺新淨左(但其他人唔同意喎 !), 單線雙程的路線依然難走, 不過沿途所見, 似乎起緊新路喎 ! 有點意外係由東涌入大澳要 $18, 感覺蠻昂貴呀 … 到左觀音寺, 好典型的廟宇設計, 最適合我影低相, 再番去同同事分享一下啦, 所以我好盡情咁係度玩自拍, 互拍, 同影大合照啦 ~
之後我地行到去靈隱寺, 本來 12 先開始售賣的齋菜, 由於徇眾要求11:30 多就開始供應上枱, 我地的人數可以有 8 碟餸, 湯同白飯任裝, 齋菜十分美味, 好多菇類的菜式 (我最愛菇架 ~), 用油唔算多, 味精亦唔算重手, 份量非常足, 絕對可以餵飽 13 隻餓鬼, 係一圍合格的齋菜, 而食飽的我地見隔離枱有"魚"上, 最後硬要加多條小的芋頭魚 (HK$ 30), 成為名符其實的九大簋啦 !!
而呢一日的下午, 我係約左一大班人上我家打開年邊爐, 我將我係HK, AUS 同UK 相識而呢一刻又身在HK 的朋友, 一次過約晒黎見面, 雖然唔齊人, 但數目都唔算少架啦 !
打邊爐的材料好豐富架, 只係買料都用左唔少錢, 仲要叫朋友帶多一set 鍋上黎先夠用, 不過真係好開心, 玩得開心, 食又開心, 多人打邊爐係真係好玩 d 架 !! 是日甜品係自家制麻蓉湯丸, 呀, 自己用糯米粉搓的粉團又幾好食喎, 分分鐘好過係街買添呀 ~
最好笑係阿媽硬要捉我的朋友開枱, 50 蚊底都唔放過, 咁玩一玩有幾個朋友就趕唔到尾班車番屋企, 一係要留底過夜, 一係去人地度過夜, or 要坐的士番屋企啦, 哈哈 …..
