初五, 唔知死的我, 傻下傻下咁跟左阿媽同細佬佢地去澳門, 點知去到港澳碼頭時已經知死, 嘩 ! 條龍長到丫 ….. 好在世界上有網上預訂, 細佬即刻打個電話叫朋友訂, 終於可以免受排隊之苦, 順利上船到澳門, 但回程一樣煩, 細佬只可以訂到半夜 12:30am 的船票 …..
由於工作關係, 老豆同細佬係澳門係有住處同車的, 所以一出碼頭 meet 埋老豆, 就可以到停車場取車, 又免左一場排隊啦 (聽說澳門而家好難截的士喎 ?!). 第一個目的地, 係去醫肚, 而我地神推鬼擁咁去左威尼斯人度假村度, 對上一次黎係 2 年前, 呢度仍然係地盤, 而家竟然變左咁大堆建築物, 真係不得不講一句, 中國起野真係好快手 …. 不過手工就真係麻麻, d 裝修連 Disneyland 的佈景都不如, 遠睇都呃得下人的, 扮得幾似威尼斯的 Building (有幾橦可以話係照dup !!), 可惜近睇 d 手工非常粗糙, 瑕疵現晒出黎, 完全冇歐洲 Buildings 的感覺, 唔知係太過趕工丫, 定中國的師傅冇美國的咁講究啦 ~
行晒賭場同商場, 我對賭係冇乜興趣的, 但佢的賭場確實係廣闊亦都幾整齊, 通風系統算唔錯, 至少我行經時冇俾煙燻到半死先啦. 商場係典型好行唔好買的例子, 大部份名牌 + 小部份不知名牌子, 行左一圈, 除左佢 Display o個 2 隻小金鼠幾 cute 之外, 我真係冇乜特別印象囉 ……
雖然賭同買對我冇乜吸引力, 但係一講到食呢, 我就會好精神. 本來今次黎澳門係想到匍京的日本餐廳食番餐, 睇下點解老豆同細佬對佢咁讚不絕口, 但係呢間餐廳係逄星期二由日本入貨架, 呢日係星期一, 所以時間上唔係好o岩, 咁我地決定黎試下威尼斯人呢間日本野 – ROKA.
佢唔講我真係唔知, 原來呢間餐廳係 London 同 US 都有一間店, o係 HK 置地間叫 ZUMA (點解要改名呢 ?!), 就係細佬聽朋友介紹話龍蝦天婦羅好正o個間, 但因為佢被評 service 幾差, 我一直都冇去到. 今次黎澳門反而試到喎 ….
整間餐廳的裝修非常簡潔, 以淺木色為主, 餐廳分前後 2 部分, 前部份有 Bar 枱, display 各種唔同的 sake, 後部份係用餐區, 中央有一個廚師枱, 係整 sushi 同 爐端燒的地方. 而四周就放左幾張大圓 / 方木枱, 枱與枱之間夠晒空間, 絕對唔會覺得迫.
我地到達之時只有一枱人, 所以餐廳非常安靜, 侍應生主要講英語 (樣子似係印亞籍仕), 亦有幾位講國語的, 我反而唔係好肯定佢地講唔講廣東話, 但後來出現貌似 Manager 的女仕係講廣東話的 ! 每一個侍應都好有禮貌, 服務非常周到, 可能當時人較少, 所以有時出現 4 個侍應同時 serve 緊我地張枱. 佢地每上一道菜都會介紹菜名 (英文), 而用到的食具都會預先配置好, 換碟, 倒酒/茶的次數亦算合理, 亦唔會令你有好趕的感覺 總之就係食得幾舒服啦 !
呢度本 menu 唔係好厚, 但老豆話唔想諗, 就要左 3 人份的 Chef's recommended set (好似共有 12 道菜, 我冇細睇個 menu 就俾老豆搶走左 ….. ), 本來話要 1 人1 set, 但係侍應話 3 人都夠食, 咁就聽佢講啦, 點知食到最後真係 3 人份都多得滯囉 ….
我地係叫菜前, 先開左支 Sake, 酒好醇好香, 好易入口, 到侍應生介紹時先發現原來有好多碎金薄浸左係樽底. 至於菜式順序介紹 (確實菜名真係唔記得, 只可以大概形容) : 帶子麵豉湯 (冇相), 竹籠凍豆腐, 魚生拼盤, 熟蝦手卷, 三文魚雜菜天婦羅, 餃子, 燒帶子 (冇相), 燒牛柳, 燒冬菇, 燒 Sea Bass, 什菇菘茸飯, 甜品拼盤.
食物做得非常出色, 連平日細食的細佬都冇停過手, 凍豆腐夾著蔥花及薑蓉, 加少量豉油來吃, 滑得黎好清香, 三文魚天婦羅做到外脆內嫩, 樣子平凡的餃子依然令我吃過不停, 加上牛油去燒的冬菇另有一種滋味, Medium rare 的燒牛柳燒得o岩o岩好, 切成薄片再沾特制醫汁來吃, 真係又香又軟, 燒 sea bass 燒得魚皮又香又脆而魚肉仲係非常嫩滑, 什菇菘茸飯就最受阿媽歡迎, 甜品拼盤亦冇令人失望, 非常精美, 一角的大塊冰上放了 4 個雪糕球, 另一角放了鮮什果, 其餘有 3 件西式糕點 同 1 盅鮮果 tiramisu. 每一件都係好好食架, 加上份量唔大, 唔覺唔覺就被我地 4 個消滅左啦 ….
Overall, 呢間餐廳真係俾到驚喜我地, 最欣賞依然係佢的 Service, 比起好多 HK 的 5 star restaurants, 佢真係可以話水準唔錯, 至於收費呢 ?! 當然唔會平得去邊啦, 但係以場地, 服務 同 食物, 價錢貴係合理的 !
