星期五放工後, 走到中式超市作每月搜購, 最近都見到有 Frozen 牛筋賣, 我未見過生勾勾的牛根, 更唔好講話煮啦, 通常都係出街食之嘛, 呵 ! 想不到 UK 都會買得到, 咁今次一於試整下啦 ~
食譜係跟蘇絲黃所寫的, 網上好多地方都有, 我呢個係以前係飲食男女 saved 下 ~
材料 : 牛筋 (佢話 8 條, 但我係咪都 1 pack 咁買番黎), 白蘿蔔 1 個 (要重身, 但我買左 2 個 !)
調味汁 : 八角 8 粒, 花椒 2 小撮 (2 者放入茶包袋), 老抽, 生抽, 冰糖
前一晚先用滾水, 加葱段及薑片, 連牛筋一齊炆. 以開火炆 30mins, 熄火唔開蓋焗 30 mins 的 cycle, 連續重複 3 次 (即前後 3 hrs), 直至牛筋炆腍 ! 跟住盛好放入雪櫃備用.
到煮食之日, 滾水, 放入香料包同調味料, 將汁煮滾 (自己較味道), 再放入牛筋 ! 以煮 30 mins, 熄火唔開蓋焗 15 mins 的 cycle, 煮 2 次 (即 90 mins), 最後加入切成一件件的白蘿蔔一齊煮 45 mins 就完成.
Overall 味道都唔錯, 蘿蔔非常甜, 雖然調味時落得較少生抽, 同埋蘿蔔份量 x 2, 令味道變得淡了些, 但都無減花椒八角的香味, 不過牛根的膠質非常重, 洗煲時費了不少力呀 ~
呢道菜除了花時間, 可以算是好簡單易做, 只要睇住時間開火熄火可以了, 係屋企整完全冇問題呀 !!
