好似有一排冇乜整自家出品, 早排買了 1 kg 雪藏蝦 (我夠知新鮮蝦好啦, 但呢度又貴又難搵嘛 !!), 想到的就係用黎打番個蝦餅, 原來 1 kg 打出黎的蝦膠都唔係好多架咋喎, 上圖的大約係一半份量度啦 ~
蝦膠真係好易打, 冇乜難度可言, 將蝦仁用大刀側面拍扁, 1 隻 1 下, 之後將全部扁左的蝦用刀背當肉餅咁打, 到咁上下, 就係咁用手將蝦膠打入碗中, 呢幾下係等蝦膠彈牙 d 的! 之後將切碎的蒜蓉 & 芫茜, 1 隻旦白同豆粉加入, 再落魚露, 雞粉以作調味, 用筷子 / 手將所有材料混入蝦膠中, 就算搞掂架啦 !! 如果發覺混入材料後, 蝦膠有點鬆散, 可以用手再打多其下, 令佢慢慢變得黏一點 …
放入雪櫃雪幾小時後, 就可以開始落鑊煎 ! 有點懶, 唔想用手, 就用飯勺弄成型就放到平底鑊中, 而且我唔用炸的方法, 所以上色就冇咁均勻, 但咁就冇咁油膩囉, 最後食時, 配上泰式香辣醬 !
唔好話我自賣自誇, 但真係幾彈牙 !! 鍾意有多點蝦肉質感的話, 用刀背打蝦仁之時, 就唔好太過耐 & 密集, 但用手打蝦膠的時間就唔好慳喎 !!
朋友們, 番 HK 又多樣 Party Foods 俾你地食啦 ~
