認識我的朋友都知道, 我除了旅行, 另一至愛就係玩具, (我知, 2 種都係同樣敗家丫嘛 !) 而自從學了潛水, 我就開始儲起了 Playmobil 的 underwater series 了. 想來住係 UK 的一個好處, 就係總會有意冇意之間, 於 ebay 可以找到價錢相應頗為便宜的舊版完盒 Playmobil, 加上本地郵寄就更為便宜 !
剛剛由 Malta 潛過水, 我對潛水的熱情又重新燃起, 加上轉工受受埋埋的一團火, 令我上個星期日按捺不住, 跑了到 DIY 店買了塊大膠板回家, 自己用 Cutter cut 餐死地, 硬要加了塊厚度不足的透明膠板來分成 2 層, 誓要重新收拾日見擠迫的 Playmobil Corner ~
完工之後, 忍不住要為這個全新櫥窗拍下幾張相 ~
船長: 細路, 水清見底你唔好大半個身扒出船外丫, 因住跌落去呀 !
喂.. 你捨得出海救人未呀 ?! 救生台上個人叫到拆晒天啦 ~
Diver A: (氣泡聲 …) blu blu blu blu blu blu …
(於水底係講唔到聽唔明的, 由我翻譯句子, 意思係: Buddy 呀 Buddy, 你睇下呢邊 ?!) 
Diver B : (回話中 …) Glu Glu Glu Glu Glu …
(句子意思: 嘩 ! 發達啦 … 係你快 d 睇下呢邊呀 !!!)
結果 2 者完全溝通唔到, 第三位 Diver 搶先出手 …..
而另一邊廂, Diver C 心諗 : 搞乜有條咁醜樣的粉紅色八爪魚架 !? 唔理啦, 影左先 !
遠處的 Corner 有發現喎 …
美人魚 ?! 水底真係有美人魚住 ?! 又影相, 又打燈, 拍廣告呀 ?!
嘩.. 2 個 Deep Sea Diver 做乜走去撩條鯊魚, 咪以為 set gear 夠厚就唔怕咬先得架 !
Diver D (持刀者) : 嘩 ! 你邊位呀 ?! 係咪仆頭黨 ?!
Diver E : 唔係唔係 … 一場誤會o者, 我落黎修理船底架 !