行程來到 North Wales 第二天，尋日去礦洞，今回我地去走木橋 !
由 Lake Bala 出發出發的話, 就會先經過 Penmaenpool 呢個地方, 一個基於一道可以讓車輛橫跨 River Mawddach 的舊式收費木橋.
所有車同人都一樣, 只要想過呢道橋, 就得先繳費 ! 咪以為呢條橋咁舊就冇咩人用, 當日我地去行條橋之時, 來來回回不知幾多車經過呀 !
老實講, 收費並唔算貴, 行人每人 20p, 私家車每架 70p, 以純觀光角度都幾抵玩架, 可惜今日真係唔順路, 如果唔係我就將架車開埋過去架啦 !
繼續開車去一個都幾難搵的火車站, 位於 Fairbourne 前一個站 : Morfa Mawddach.
開車去呢個站的話, 記得要留意由 A493 轉入去小路個路口, 我地要來回左一次先搵到, 跟著小路一直開到尾, 就會係一個火車站的停車場, 呢個站就係 Morfa Mawddach 啦 !
由呢度出發的好處, 係比起由 Fairbourne 出發, 路程起碼短一大截, 用 11 號巴士行又得, 帶埋架單車過黎踩都得 !
不過, 係呢度出發要留意番, 呢條 Railway 係仍然在運作中, 即係話隨時有火車會駛過, 因此要橫過路軌的期間, 請留意廣播及四周環境.
沿火車軌走上一段路程, 就會發現自己開始踏上了 Barmouth Viaduct, 一道建於 1867 年的古老木橋. 這道木橋之所以非常聞名, 皆因可以讓火車, 單車同人都通過的跨河大橋 !
於 2013 年前, 通過這橋是要收費的, 不過呢幾年個收費亭都已經被棄置了 !
呢條郊遊路線非常值得推介, 風景優美又易行, 唯獨呢個河口位置非常大風 ! 我們到訪當日, 天氣麻麻, 咁大風都真係吹到幾凍之餘, 仲要人都吹得郁呀 !
過左條橋就係 Barmouth, 一個都有幾分旅遊感覺的海邊小鎮 !
誠意推介大家入小鎮逛逛, 除左小鎮風情濃厚外, 鎮內小店林立, 尤以 Fish & Chip Shops 最受觀迎, 2 家本地最有名的炸魚店, 皆要排住隊去買, 係英國黎講都唔係咁常見架.
我地去左近海邊一點的 The Mermaid, 3 個人叫 2 份保認夠晒飽, 條魚炸完出黎真係好鬼大舊架 !
講得係海邊小鎮, 又點可以唔講下海邊丫 … 呢度係堅有一個長沙灘架 !
呢個沙灘都好長下, 仲要都濶架, 因此我們笑說呢度就係英國版的鳥取沙丘哦 !!
可惜是日天氣冷, 風太大, 唔想食沙都係逛過就去沙灘附近間 Cafe 坐好了, 飲住杯咖啡, 透過玻璃窗看沙灘, 咁就又暖又舒服啦 ~~
沿 Barmouth 的港口步行, 直到上番小山丘就開始回程路段, 沿 Barmouth Viaduct 回到 Morfa Mawddach, 就算係完成左是日主要觀光點~
開著車沿海邊走, 打算離開 North Wales 前作最後之觀光, 無意中經過一個本來平平無奇的地方 : Llwyngwril !
係架, 冇旅遊書介紹, 亦未見網誌上有介紹, 但開車經過卻有意外驚喜. 似乎有位很用心的村民, 為這個小村落加添一點生氣, 用毛冷織左好多唔同的大型公仔, 散佈於村中不同角落, 我們沿途去尋找那些作品, 都真係幾得意架 ~
隨著天黒, 我們進入趕車程狀態.
由於不熟悉這區路線, Google Map 又不時 lost signal (期間我地開左入去一段屬於人地 farmland 的路, 結果係黑暗中我突然見到一堆反光的眼仔, 原來係一堆羊坐左係馬路邊, 真係嚇左我地一跳呀 !), 仲 加上我又忘了睇屋主提供的 direction, 結果我地開左好幾小時的車程才到達目的地. 幸好當中包括順利去埋超市買餸, 因為今回入住的 Cottage 係可以自家煮食架 !
搵呢間 self catering cottage 都花了點時間, 又要打俾主人問問方向, 幸好最後順利到達之餘, 仲非常滿意呢間 Cottage 添呀 !
Cottage 屬 2 房 1 廳 連 廚房, 基本上一切用品皆齊備, 整體裝修新淨, 又乾淨整齊, 真係舒服到呢 ~ 最重要係熱水夠晒, 水壓又夠, 暖氣仲有點太暖添呀, 呢度我地直頭唔捨得走呀 ~
Paradise Farmhouse webpage : http://paradisefarmhouse.co.uk/
Cottage 住宿費不包括早餐, 但屋主仍為我們提供部份早餐食材, 麵包是自家焗的, 雞蛋係鄰居自家的 organic 出品 !
是日有點晚, 我們快手煮了個豐富晚飯, 先醫飽肚再說 …
夜晚到埗之時, 尚未能察覺到周遭景色之美 !
起床後往窗外一望, 就明白為何屋主將 Cottage 的名字改為 Paradise 了 !
屋主是一對上了年紀的老夫婦, 為人友善, 樂於為人介紹觀光點, 以及在這 cottage 附近的行山路線 !
以下是我們的早餐, 其中一朝煮左公仔麵,係因為朋友已對英式 cooked breakfast 有點厭倦了 …
屋主就住在 Cottage 旁的大屋, 另設有一座 game room !
屋主年輕時曾長期住在 Colombia, 太太就是來自 Colombia, 因此這座 game house 的設計就是帶點當地特色, 最重要内裡掛滿了屋主當年在 Colombia 生活時拍下的照片, 非常精彩 !
這就是生活吧 ?! 這種人生也算得上很精彩吧 ?!
睇到呢度, 大家明白我點解會咁鍾意呢度, 仲打算下年係英國時, 再去呢度住幾日添呀 !
仲覺得唔夠 ?! 俾多幾張相大家睇下先 ~~
