HK : 再來靚爆海景。由梅窩到貝澳

大嶼山就是有一種吸引力, 令人抵著山長水遠、舟車勞頓, 也要轉車轉巴士咁去到行個山 ~

這天我們又幸運的得到藍天白雲, 再次跑到大嶼山的海邊, 來一趟屬於本地卻充滿 “外遊 feel” 的旅程 !

起點在閒日不算多人的梅窩, 我們的早餐也在這裡的懷舊冰室解決, 只要在網上找一找麥生記冰室, 就知道這家店算是梅窩的景點之一, 來到這裡打咭的遊人絕對不少, 但我們主要還是想食個好食早餐才出發行山 ~

麥生記的早餐不錯哦, 充滿著學生年代的情懷, 仍然用生命麵包來作套餐多士的餐廳, 如今也不會很多吧 ?! 講講下, 發現我都真係好耐冇買過生命麵包添 …

呢條路線之起點, 就在鳳凰徑第 12 段之終點, 由梅窩沿海邊山徑逆走回到貝澳 !

講真遊人不多的梅窩其實很不錯, 如果真係搬入黎住, 我係咪會冇晒朋友架 ?!

路線頭段全為大海靚風景, 曝曬下是熱了一點, 但個海真係又藍又靚 ~~

間唔中我地都可以走在樹蔭之下, 咁順手可以擋下太陽, 抖下個人 !

出發前, 睇過網上的介紹, 呢條前往貝澳的路線, 最常就係遇到水牛了 !

就係我地行經一處叢林之時, 我地遇到正在吃大樹菠蘿的水牛, 佢地身型跟西貢遇到的黃牛差不多, 但卻是截然不同的品種, 水牛牛角要再粗壯一點, 皮毛顏色也不同, 喜愛藏身在泥潭之一, 特別喜愛大嶼山貝澳附近的濕地環境, 因此能夠在這附近常見牠們的影踪 !

呢度係牛牯灣, 行到呢度會見到數間荒廢村屋, 走到海邊可以為美景打卡, 也可以藏在林蔭之中小休片刻再出發 !

繼續前進就會去到橫塘, 卻先會經過一道又一道的海灣風景 ~

唔經唔覺就會走過橫塘再接上十塱, 十塱是個人氣比較旺盛的地方, 可能係有車可以開到入黎, 自然也較多人居住在這條村啦 !

呢度都係水牛的聚居地黎架, 間唔中就會遇到幾隻, 之後我地係黃昏時間仲遇到一大群在草地上覓食的水牛添呀 ~

來到十塱可以直接沿車路出番貝澳, 有氣力則可以繼續行入芝麻灣, 亦即以前芝麻灣戒毒所 (於 2005 年改芝新懲教所) 及芝麻灣懲教所的所在位置, 兩座懲教所皆於 2010 年時已關閉, 睇番資料先知, 原來這裡就是當年越南難民的收容所黎架啦 !

由 2010 年到而家 2020 年, 成 10 年都仲未可以翻新到黎用, 咁大的公共資源就放左係度擺, 重開黎做監獄博物館都夠有趣啦 !

如要繼續前往十塱水塘, 就要黎到芝麻灣懲教所的更亭旁, 由呢度上山繞過懲教所, 咁先行得過去啦 !

十塱水塘 !

唔睇資料都唔知, 呢個水塘竟然曾經係離島居民 (長洲 & 坪洲) 的主要水源, 遠係 1950 年時期, 就由呢度利用海底水管引水到長洲, 直到 1970 長洲併入香港供水網絡, 先將十塱水塘改為灌溉用水塘咋 !

話時話喎, 呢個小水塘都真係幾靚架喎, 有時間行埋入黎影張相都唔錯 !

十塱水塘算係呢度的 end point 黎架啦, 最後都係要番十塱的, 只在係點行番去 !

可以原路經芝麻灣折返, 或有氣有力上埋老人山先番, 而我地就行左上去芝麻灣上的山路番, 順道影埋芝麻彎的全景 !

回到十塱, 我們的走動剛好驚動了河中的水牛群, 眼前突然出現了尤如動物大遷徒的一幕, 心諗有冇咁細膽呀你地 !!??

另外, 係大草地上第一次見到水牛 BB, 佢充滿好奇咁望住我地, 呆呆的樣子非常的萌 !

沿著車路去貝澳, 也是這天的終點站所在 !

在水中的水牛, 原來可以 enjoy 到咁樣架喎 !

睇住佢係咁玩水浸水, 我都忍唔住想笑出黎 ~~

又長又廣濶的貝澳沙灘, 記得小時候也有來過, 可惜記憶模糊, 原來這個鏡面沙灘都真係靚架喎 !

呢度可以游水, 亦可以滑浪, 最出名卻是曾經俾人挖晒爛晒去摸蜆 ! 大家睇下桶中蜆之大小, 而我話你知呢種蜆可以長到手板咁大, 就知桶入邊嗰堆只係小朋友黎架咋 ~~

日落黃昏, 我們在漫步回貝澳村中 …

食完早餐後, 就冇再食過正餐的我們, 實在捱不住空肚回東涌, 就係貝澳搵左食先 !

估唔到呢間茂記的小炒幾唔錯, 乾炒牛意、蠔仔粥、金銀蛋莧菜、椒鹽鮮魷 & 匍汁焗雞飯都係有水準的出品, 玩夠食夠, 是日行程大滿足 ~~

2 thoughts on “HK : 再來靚爆海景。由梅窩到貝澳”

漂泊中的魚