話說舊年玩過呢個日潛夜潛本地 LOB 之後, 我地都好期待再玩多次, 結果終於係 10 月成行, 但我竟然搞到本年度最後一日先出到 PO, 只能怪我實在太愛玩了 …
今回我地準備十分充足, 飲品食材一大堆, 將整個廚房的空間都打爆了 !
我地出發啦 !
天氣係似預期中的藍天白雲, 可惜清水似乎隨著中秋遠離了 …
(其實今年中秋都好似冇左大藍水囉 …)
第一潛係浪茄, 之但係望下個海, 奶白奶白的一片 …
結果 … 只有數名壯丁下海了 !
冇計 ! 全船唯有退回橋咀, 我亦都落左是日第一支, 來一趟黃昏潛 !
下午 5:30, 27 度水溫下, 最深去到 11m, 但其實主力 4.6 m 浮游, 玩左 30 mins 咋 …
因為 … 我影完呢 3 張相之後, 就唔見左個 buddy 了 ~
上水搵左陣, 順便睇埋個日落, 我都潛番入水了 …
可惜, 冇咩特別嘢見到, 算 ! 留番夜晚慢慢潛 ~
LOB 其中一大重要活動, 入夜後的海上 BBQ !
今年是同樣的豐富, 要海鮮有海鮮, 要扒又有靚牛扒, 仲有姐姐雞翼 同 柚子燒鱔 !
第二潛係晚上 9 點, 同樣係橋咀, 最深去到 9.1m, 都玩左 50 mins !
今回都見到唔少魚, 仲要有好多係 BB 黎添, 好得意呀 ~
佢隻色好靚呀, 係咩魚的 BB 呢 ?!
咁影條牛鰍, 原來會有型左架 !
突然遇上的小墨 …
我本來集中咁影緊細魚仔, 點知潛潛下撞到佢, 我自己都嚇左一下 …
一句概括 : 其他的魚 !
嘩 !! 第一次夜晚見到瞓覺的黃衣呀 ~
佢個樣真係好鬼得意呀 !!
第 3 潛係半夜 11:59, 同樣係橋咀, 水溫回落到 25 度, 最深只到 7m, 半夜三更都可以潛左 75 mins 架喎, 誰說我地唔爛潛丫 !
瞓覺中的魚, 身上顏色同白天有點不一樣, 呢條係豆鼓蝶黎架, 白天的大黑點已變成灰白色 !
另一條瞓覺中的黃衣, 今回影得再清楚一點 !
佢個咀仔真係好好笑 ….
潛潛下, 俾我地遇到呢條極度活躍的杉𩺬, 那有點巨大的身型, 真係游近我地多一點, 我都有點點恐怖的感覺 …
其他睡覺中的魚, 顏色跟花紋跟白天的, 同樣都有點不一樣 !
好, 半夜 2 點多, 本想先睡一會, 可惜是晚風勢超大的, 薄被也抵不住涼風來襲, 我整晚剛入睡便被風吹凍醒了 …
不過, 總有潛友無懼黑夜, 繼續落水去 ~
第四潛, 期待已久的日出潛 !
早上 06:00, 26 度水溫下的橋咀, 由 9.8 m 玩回到 4m , 都玩左 61 mins 架 !
日出前的魚群在逐步甦醒中, 本來可以輕易影相, 點知佢一醒就游走左 …
夜晚見唔到, 而家先出番黎的火點 ~
佢係咪黃衣的小朋友版呢 ?!
顔色淺淺的有點靚喎 ~
衣 BB 空群而出, 水底好似開始熱鬧起來了 ~
又另外的一班小朋友 !
完場前仲俾我見到呆呆的橙色倒吊 Goby 呀 ~~
日出後的橋咀, 天空上的點點雲, LOB 的禮物 !
早餐, 暖暖的公仔麵, 仲要搭條菜添 !
正呀, 非常適合潛完急需暖身的我地 ~
被奶水 & 風浪 打倒了的潛友, 只能在船上看著壯丁們, 下水去親吻海刺了 !
兩日一夜的 LOB 在不完美中, 劃下完美的句號 ~~
玩完仲可以番去 Hush Hush 食杯自家製雪糕, 都幾開心丫 ~
