端午節, 好多年的端午節, 我都唔係 HK , 可以話好多年冇食過稯囉 ! 我本身係唔鍾意食稯, 食都只會食用外婆食譜整出來的, 仲衰衰咁只愛吃外面層糯米, 食入到綠豆都有少少不情願, 更唔好講到中間心旳肥豬肉同咸旦黃, 而收拾殘局的一定係阿媽 !!
記得以前端午節, 各家族成員總會一起到外婆家聚會食飯, 走時阿媽就會帶住一大袋稯回家; 到早幾年前外婆身體大不如前, 一個人應付不來我地的苛求, 結果轉移到我家, 在阿媽o個一代+屋企的賓賓協助下, 先完成到任務 (某一年剛剛在港, 可以幫到手, 咁先學到下野!) ; 再到今年外婆剛開始要洗腎, 跟本冇時間/心情去整, 所以今年只有阿媽在家整了 20 多隻分發出去. 既然我咁多年冇得食, 今年有時間有材料, 就整番一些應下節啦 ~
外婆的稯到今時今日, 我都唔知佢歸落咩種類, 同埋佢係長條型, 而唔係成日見的金字塔型架喎 !
材料有 : 竹葉同草繩, 糯米, 去皮綠豆, 豬肉(我唔要用淨肥膏呀 !!!), 冬菇( 呢個係因為有 2 位同事係食齋的, 所以用佢黎代替肉), 外婆食譜係有咸旦黃, 一來我唔食, 二來英國賣得貴, 所以被我刪掉 ~
唔少材料都要包稯前一日要準備 :
1. 糯米要浸過夜, 隔掉水後, 用油同鹽拌勻.
2. 豬肉用五香粉同鹽醃過夜.
3. 英國冇去皮綠豆, 要先浸 2 日, 再人手去(嘩 ! 去到我手皮都發白晒呀 !!!) 跟住又係隔掉水, 用鹽拌勻.
P.S. 呢 3 樣野都要用鹽, 自己就份量但唔好過多, 同埋我食稯係點糖食, 所以跟本唔洗點要咸味, 但若果你想食咸, 就預番多少少啦 ~
竹葉同草繩要用滾水煮過, then 放埋一邊準備好, 就可以開始包啦 !
用 3 – 4 塊竹葉排好手上, 一塊蓋上另一塊的 2/3, 我第一次包怕會漏, 用多一塊放中間 (double layer !). 先放糯米, 跟住綠豆, 再放餡 (豬肉 or 冬菇), 跟住再放多層糯米蓋住, 就可以埋口 ! 先將葉尖開口向後反, 用手按實, 記得要一邊順下葉紋, 唔好有洞口, 跟住按實呢邊的, 同時反埋另一邊開口, 用草繩以任何方法將稯包實 ! 不過我點包都包唔到阿婆o個種中間要有小尖角的型呀 ~
我今次一共包左 12 隻 : 8 隻肉; 4 隻齋 (用牙簽識別) !
將一打稯排好一層一層入煲內, 用水蓋過咁煮 1 hr, 跟住要反稯, 即底層的放上面, 面層的放番落底, 之後再煮多 1 hr. 我估我係煮多左時間架, 因為我整出黎的好似細隻過阿婆o個 d, 咁應該唔洗咁耐 ~
煮好左, 就取出隔水, 而我即刻開一隻黎食, 從外表黎睇佢真係好似黏飯呀(第一次自己包, 多多包涵 !), 味道都唔錯 (冇話太咸 or 太淡), 確實如阿媽所講點都要放 d 肉, 唔夠油水隻稯係唔夠香的, 我真係食到近肉的糯米同綠豆係好味 d 架, 唔知咸旦黃係咪同一道理呢, 但我真係唔食架喎 ~
