不得了!! 由聽日開始, 我要齋戒 1 星期來清腸胃了 !! 我由星期五晚開始, 連續飲飲食食左 3 日, 真係有點飲食過度啦 ~ 
==================================
星期五晚, 放工後就趕到英國北部, 怪就怪自己抵不住朋友要求, 應承了陪佢出席醫院的 Dinner Party ! 有參加過 Formal Dinner 的都大概知道, 呢種場合係要著到非常正式咁出席, 但我並無多理會, 依然一身番工的 smart casual dress code, 哈 ! 去到現場就確實顯得有點奇怪囉 ~
講到呢餐, 真係不知所謂 !! 呢個 Party 係 NHS 搞的 60 周年紀念 Dinner, 收 10 磅人頭費, 卻只提供 party finger foods e.g. sandwiches, spring roll, chix satay, potato wedges ..etc, 飲品仲要另收費, 慳皮都唔恨, NHS 真係窮得可以, 最頂佢唔順係, 一早預算 500 人出席, 但竟然話明唔會預足 500 個座位, 結果我同朋友冇位坐, 企住咁食完一餐 !! 最可憐係我食飽仲唔走得住喎, 要等埋阿某高層的 speech, 同切埋個爛鬼 60 周年糖膠旦糕, 我先可以走, 真係可算悶足一晚, 不得不再一次埋怨, 多得呢位朋友唔少 … …
===================================
星期五晚跑到朋友家過一晚, 星期六 Day time 到了 Southport & Formby 遊蕩 (details 留意下一篇啦), 晚上回到朋友家中, 朋友的父母非常好客, 邀請我一同做節, 2 位手藝非常了得, 煮了一桌美味的大餐, 有日月魚雪耳紅蘿蔔湯 (非常甜), 白勺蝦, 蒸魚, 自製叉燒, 家傳鹽焗雞, 炆冬菇枝竹 同 勺生菜 !! 嘩 ! 幾咁豐富呀 ! 我當然亦唔客氣地大吃一餐, 飯後仲要食多片起沙的西瓜, 先安然又食又拎地回家 ~
我拎左 d 咩 ?!
1. 自家製的叉燒 – Uncle 煮了一大盤, 預了我帶走一份, 真係多謝晒呀 !
2. 自家種的魚翅瓜 – Auntie 於後花園種的瓜
3. 一棵我尋遍英國的臭草分枝 – 就因為欠呢一味, 我有好一陣子放棄去煲綠豆沙啦, 分枝家下尚未落泥, 要先將佢放入水中養根, 但 Auntie 話成功率未必好高, 叫我試試, 邊位有保呢根獨苗的方法, 請幫幫忙 ~
==================================
到了正日的星期日晚, 由於很早已跟朋友約定, 將與他們一同做節. 我便於黃昏時間開了個多小時車南下, 到一家舊式的中國餐廳食飯 ! 別看門面同地區那麼古舊, 朋友們卻對此餐廳十分推薦, 主要是老闆煮得一手廣東菜, 特別係海鮮 !
我地一行 5 人 + 1 個 15m 大的精靈 BB, 點了 7 個餸, 整枱中國人卻無人留意到這個不吉數字, 要老闆提醒兼附送一碟叉燒, 剛好砌成八碟. 我本來對英國所吃到的海鮮無甚期望, 但呢間餐廳卻俾到我一個驚喜. 先後有 粉絲蒸蟶子, 白勺蝦, 薑葱龍蝦配生面底, 椒鹽魚, 黃金鮮尤, 沙嗲牛肉煲, 炒芥蘭 及 叉燒 !
所有海鮮餸菜都煮得很港式, 蟶子跟龍蝦(有對大大的鉗, 肉質非常滑 ~) 都由 scotland 運來, 吃得出很新鮮 ~ 椒鹽魚最欣賞, 先起肉, 再將魚骨炸成籃型, 再盛起炸好的魚肉跟香料, 由肉都骨都可以吃到肚中, 而且賣相非常討好 (可看相). 黃金魷魚是用咸旦黃來開炸漿, 炸得很香. 我只吃了頭 5 道海鮮, 已經感覺到飽肚, 尚餘的餸菜都只可以淺嘗, 最後還送來糖水一碗, 但跟本已吃不下了 ~
最令人意外的, 還是那張單, 8 個餸菜 + 飯 + 酒水, 埋單 85 pounds, 每人才 17 pounds, 真係很抵吃呀 !!
這樣吃法, 我唔齋戒番一星期, 怕且有埋滯囉 ~
講左咁耐, 補番句 : 中秋節快樂呀, 咁多位 ~~~~~~
