漂泊中的魚

 

31/10 Bogota, Colombia
Bogota 機場朝早大霧關閉, 班機降落唔到，結果轉飛 Cali。
一等就等到 11:30 先可以再飛番 Bogota, 到左都接唔到 Havana 班機啦 …
死迫難迫先換左張1/11的 boarding pass, 迫住咁入埋Colombia 境，本來計劃上係唔打算遊 Colombia 架 !
航空公司的職員有點懶懶閒咁，問 3 句答 1 句咁，還好航空公司包左酒店 + 3 餐，不過冇行李就冇洗換衣物，好污糟哦 … …

 

1/11 Havana, Cuba
早上去 Havana 的班機如常，可惜行李果然冇跟住轉送 (還好至少航空公司知道行李仍在 Bogota)，我們只得到登記表同 2 個電話號碼，就 2 手空空地步出機場。

 

係機場門口有 2 大條人龍，係排隊換錢的，呢排隊的半小時內，我要改變行程及住宿安排 (Havana 住宿幾爆下，原來 11月剛踏入 high season)，電話打出了好幾個，還好總算有個地方落腳 !
順利用 25 cuc 坐到去民宿樓下， 原以為要行 8 層樓梯，點知咁好有電梯架呢 !
8 樓的好處 … 有個大露台 with 海景，靚 ! 呢間民宿的主人超好，幫我地打電話追行李，又安排到泥鯭的送我地去 Trinidad.

這天餘下時間就在 Havana 的海邊及市內遊走，買到件價值 10 cuc 的 Tee 作睡衣，吃過晚飯就回民宿休息。
Cuba 的日落係下午 7 點 … 好似好晏天都未黑齊咁架 !

 

2/11 Havana, Cuba
上午跟民宿主人個仔，走了一轉 3 小時的 walking tour (30 cuc), 有點眼花瞭亂 …

 (呢個粟米炸餅好好味呀 !!)

 

吃完午飯，2 點左右回民宿，那才是惡夢之始。邊等那原定 3 點送來的行李，一直等到 5 點多，期間打了 40 次那 2 個唔會通的電話號碼，感覺很無助。

冇法，我們還是要先去另一家賊窩般的民宿 check in, 民宿主人感覺有如姥姥，其下有位外冷內熱的大隻男，我們苦候行李不果，正打算動身去機場一轉時，行李終於送到了。

坐住由姥姥安排的老爺的士，心諗好在而家唔洗去機場咋，總之成功得回行李，我地成晚在執拾當中，而大隻男很好，之前為左安慰我地，係咁俾生果我地食，夜晚又夾左份三文治俾我地。 而姥姥除左見面那刻，得知我地之後會離開 Havana，就冇理過我地啦！
大隻男，你跟錯老細啦 !

 

3/11 Havana, Cuba
上午有目的地走入舊城區，想找過一家回程時的落腳地 (即另一家民宿)，又好彩地俾我地搵到喎 !
一切 ready，我地再次漫遊 old Havana，再食埋午飯，先坐泥鯭的走佬。

 

呢程一坐就係 4 小時，走了大半條空蕩蕩的 national highway，轉入小路後，盡是馬車同馬，原來馬就係本地主要的交通工具 !

入住 Trinidad 的民宿，剛好趕到睇一個完美的日落，最終係呢度食左龍蝦做晚餐，旅程似乎回歸順利 …

 (知唔知佢地係度做乜 ?! 一定唔係捉 Pokemon !)

 

4/11 Trinidad, Cuba

本來想係 Trinidad 住多 2 日，但全個 Trinidad 似乎迫爆了遊客，大部份民宿都滿了，民宿主人未能為我們找到 2 晚的住宿，我地唯有用半天一遊 Trinidad, 之後再用 100 cuc 包的士去下一站。

呢朝早要去銀行換錢，點知佢話人太多唔俾我地入去，仲點我地去幾條街遠的找換店，結果換左 61 張 5 蚊紙番黎 ! 算啦，對率唔錯之餘，最緊要係換到錢 !

花了個多小時在 Trinidad 這個小山城遊蕩， 越行越接近中午就越熱，而且 … …都冇咩好再去逛了。上過了 bell tower, hea 在小廣場聽 live music, 最後食埋個唔錯的午飯，是時候又動身 !

 

2.5 小時後，我們來到了 Playa Giron ! 呢間民宿果然係 TA 第一名，食住皆無得頂 !
黃昏日落於海邊 ，Coco beach 係就係水清沙幼，但沙灘上超多蚊滋咬死人 …

好在有豐富晚飯補番數, 呢度必定要食佢的海鮮, 龍蝦 / 大蟹 / 蝦 同 八爪魚都煮得好好味呀 !!

 

5/11 Playa Giron, Cuba

呢日終於唔洗趕車程了 !
我終於可以係 Caribbean Sea 潛水啦 …
來到 Bays of pig 呢度出名有 Walls , 一潛 2 支都係 50 cuc , 包 gear 連 instructors !
水中無大野，就係一片大藍水及大片珊瑚礁，小魚都多，影景係幾靚架, bonus 加埋架 ship wreck !

 

2nd Dive :

 

是日日落 & 這晚，又食左龍蝦啦 … …

 

6/11 Playa Giron, Cuba
早上花 15 cuc 坐住馬車學人去 Zapata swamp 玩 wildlife tour. 睇的野唔算多， 去左蝙蝠洞，又睇左 cenote，但餵蚊餵到我成身冇度好肉 … …

 

吃過中午飯，我地又用 100 cuc 包的士番 Havana, 今回用左 2 個半小時，而司機哥哥雖然俾人炒左牌添 … … 但都仲要笑笑口咁送我地走
下午的 Havana，去 chocolate museum 飲左杯凍朱古力，閒逛左陣，再去民宿話事人介紹的餐廳吃晚飯 !
黎左古巴咁多日，真係冇一餐令人失望架喎，係佢地餐廳水準整體咁高丫，定我地好好彩呢 ?!

 

7/11 Vinales Valley, Cuba
用了3 天時間嘗試去聯絡當地一個 tour guide, 結果佢個手機長期關機狀態，咁即係跟唔到佢的 Vinales tour 啦 !?
一場黎到冇理由唔去架 !只好臨時臨急搵民宿職員，安排左個司機俾我地，140 cuc 包車去 Vinales !
去 Vinales 要太約 2 個多小時車程，去到行程全由司機安排，言語不通就係咁，冇得太多要求。

去了一個可以坐電船的 Cave, 吃了一頓貴午飯 (竟然要 38 cuc)，看過煙草已被收割了的 Tobacco farm, 也看了如何 hea 包雪茄，騎了馬在 Vinales Valley 中遊走，錢確實是比預計中花多了，不過是日旅程還是可以的。
繼續欣賞於旅程中所遇到的人與事，同時包括了天氣，離開了雨中的 Havana, 我們得到了一整天的好天氣 !

 

8/11 Havana, Cuba
現在的我正在離開古巴的航機上 !
這 2 天我都睡得很長時間，每晚也有 8-9 小時哦 ! 起來吃過早餐，再收拾一下行李，就出門處理最後的事項 …
先去寄了 postcard, 買了一件小手信俾自己，打算買點咖啡豆卻不果，只好就在 Plaza Vieja 喝了一杯。
由民宿店員介紹下，上了某大樓頂看過了 Havana 的反射影像，Bonus 地看到另一角度的 Havana !!
離開 Havana 前，最後吃了也是由民宿店員介紹的雪糕，Mojito 飲得多，雪糕還是第一回 !
順利坐的士去到機場，候機期間吃了頓不怎麼樣的午餐，用餘錢隨意買了包當地咖啡粉，我們就這樣的離開了古巴 !

 

總結 :

古巴是一個很有趣的國度，人民的教育水平整體都不俗，亦不少年輕人願意去上 Language School 學英文，因此整體人民質素比預期中好，至少我感覺在古巴我是頗安全的。
在古巴機乎餐餐都吃得好，價格有高有低，17 cuc 可以吃到龍蝦，11 cuc 已經有份二人前的 paella， 飲品 1-2 cuc 有交易，要喝當地名物 Mojito / Rum, 3-4 cuc 都可以架啦，係呢度真係不愁吃的。
住 … Hostal 位置環境有參差，但整體質素絕對唔差，冷熱水齊備，水壓大多沒問題，冷氣夠晒凍，仲唔會停電，比我以往去過的發展中國家仲要完善 !
交通係我地花費最多的，包一程的士以 100 cuc 起標。
人數少可以坐巴士，但一票不易求，還得另要考慮去巴士站的方法。
另一方法是請民宿接洽 collective taxi, 但只適用熱門地點，又省錢又方便 !
古巴的旅遊業，特別 Havana 正急速發展中，現今的配套似乎無力接待大量訪客，Hostal / Cass 都爆滿了，Havana 很多古樓都被規劃起來，將發展成大型酒店，我想如果還想一睹古巴原汁原味的一面，就得好好把握未來的 1-2 年了 !