HK : 2016 連跑兩回 – WWF 跑出未來 & Angry Birds Run

 

最近好勤力, 連續兩星期報左跑步 Events !

如果只係跑呢, 我諗我問題都唔大的, 但當上星期的 10 公里接住一個潛日, 而本星期則行完 9 個鐘山再黎跑 3 公里, 我兩個條腿兼兩個膊頭都攰到快要甩出黎啦 … …

早前買了對新鞋, 我沒有太講究的, 反正我不是時常跑步, 一對平平地可以粗著的就夠玩 !

 

第一個 Event 是於上星期由 WWF 舉辦的 “跑出未來”, 就話左我成日會報 WWF 的活動.

事實係我好耐冇去跑步, 諗住報左十公里就會練下啦, 點知 … … 我都係冇練過就去跑囉 !!!

這場路跑在黃昏舉行, 5 時多到達會場, 逛一下準備六時開跑 ~

雖說是黃昏跑, 下午天氣卻持續侷促, 睇到呢隻熊貓, 真係我都覺得好鬼熱呀 !!

 

 

好啦, 我們一心早完早走, 那就預早上定線, 等待 6 點鐘開跑.

本來等待之時有點焗, 隨著入黑, 開始有點涼風.

 

這次準時 6 點開跑, 由於我要專心應付 10 公里跑步, 咁當然冇可能影相.

太耐冇跑, 明顯耐力不足,  還好多得同行 Buddy 相助, 沿途在跑上遷就我的步速, 我才可以堅持下來, 不作任何停頓地跑完十公里.

最終雖然未能於 1 小時內跑完, 但都只係多 3 分鐘啫, 算係咁啦 ~

 

本星期也同樣於科學園, 由某雜誌舉行純玩樂性質的 Angry Birds Run 憤怒跑 !

這回只有 3 公里, 因此很多大小朋友同場參加 ~

出門前, 要先去吃了個蛋黃哥早餐, 唔知會唔會對肌肉疲勞有點幫助呢 ?!

 

大約早上 10 左右到達會場, 當時還未有太多遊人, 會場看上去有點冷冷清清的.

這回賽事分三場, 有 11:00 / 12:00 / 13:00, 我地就梗係玩最早一場啦 ~

 

 

估唔到會場的工作人員幾有心機, 係地上及池畔砌了 Angry Birds 群, 同佢地影下相幾好玩丫 ~

 

現場也有唔同影相位, 呢個丫叉射人夠得意啦 ~

 

 

隨著選手包送一張攤位 Coupon, 可以玩 3 次遊戲, 玩完會有禮物架 ~

我本來玩其中一個得到分, 可以換杯架, 點知工作人員話杯換晒, 得番手機套, 我心諗有冇咁早換完呀, 10:30am 咋喎 ?!

 

是日天氣真係好熱好猛太陽呀 ~

差不多快到 11 點, 我地先去起跑線, 諗住好快開跑就唔怕曬啦 !

點知過晒鐘我仲聽到大會舞台上進行著活動, 直到 11:10 左右先見到玩嘉賓們姍姍來遲到起跑線前, 結果又排陣又影相咁, 搞多 5 分鐘.

大家都知呢個活動係電影宣傳, 加上主辦單位又係傳媒, 實要交功課, 但都唔應該要我地成班跑手,當中真係有大有細咁係烈日下曝晒喎 !!

今回冇人中暑算好彩, 如果唔係你地的宣傳仲成功囉 …

嘉賓係邊幾位, 自己睇相啦, 都完全冇落場, 齋影幾張相 … …

 

好不容易, 終於成身大汗下開跑 !

今回路跑真係比上回辛苦, 一來我行完山真係肌肉疼, 二來天氣熱, 三來很多小朋友由父母帶跑, 很多時會較慢又或突然停下來, 如果停唔切都真係幾危險 !

整體這班父母都很不錯, 往往會帶著小孩跑邊, 不會阻塞跑道, 留意到有跑有在後也會讓開, 很有質素.

 

 

來到這段真係最攞命, 先上斜再落斜, 接著回頭又上斜, 大人都唔係咁頂得順, 小朋友真係有難度架 ~

跑得過真係一半了 !

 

終點在望, 努力捱埋佢.

以是日天氣, 小朋友們能完成賽事的, 都是值得嘉許的 !

我過終點之時, 剛好遇到黑島同紅島在場, 本想影張合照, 但唔夠人地快…

 

 

跑完可以換奬牌, 木製的, 幾得意丫 ~

 

當我地 cool down 下來, 剛好遇上第二場在起跑, 在龍尾見到一群年紀很小的小孩在起步, 未出發已經甩轆, 很搞笑的 ~

全身濕透下, 要快快換過衫, 剛好相約了於科學園飲茶, 那就離場去醫肚了.

6 thoughts on “HK : 2016 連跑兩回 – WWF 跑出未來 & Angry Birds Run

    1. ~ 魚 ~ Post author

      唔好話帶小朋友, 要就番隊友黎跑, 都唔係易, 始終每人都有自己步速架嘛 !

Leave a Reply to ~ 魚 ~ Cancel reply

%d bloggers like this: