漂泊中的魚

 

來到高雄, 我們只跑了一場 4 公里的 LINE FRIENDS音樂路跑, 結果卻吃了一大堆美食 … …

到埗的第一晚先吃了台中名物 – 鼎王麻辣鍋, 其鼎王鴛鴦鍋應該是最受歡迎的湯底, 兩個口味包括了麻辣鴨血 及 酸菜白肉鍋, 紅鍋任添鴨血, 白鍋則有寬粉, 兩種口味皆唔錯, 非常適合打邊爐.

近年去台灣都不時食火鍋,呢間食材都算唔差, 擺盤賣相唔會好浮誇, 入口質素都可以, 總體價格是值得一試, 反正一定比 HK 抵食 !

鼎王麻辣鍋 Webpage : https://www.tripodking.com.tw/

另一家火鍋店名為拾七石頭火鍋, 同時源自台中, 為名店輕井澤鍋物的二代店, 超受本地人歡迎, 想食記得要預先訂位, 準時去到都可能要再等下架 !

呢家火鍋店主打一人一鍋, 品種配搭非常多, 點都應該有款啱口味, 最怕你係選擇困難症, 咁就大鑊了 ~ 提下大家試埋 2 款小食 :  滷杏鮑菇 & 麻辣鴨血 ~

拾七石頭火鍋 Facebook Page : https://www.facebook.com/ShihChi.hotpod/

講真, 係台灣食火鍋, 我最欣賞其實係當地的素菜拼盤, 尤其係菇同本地野菜系 !

一份餐真真大堆頭, 又肉又魚又雜菜咁, 要食晒成份都真係一個挑戰黎架 ~

食材湯底都好好, 係可以下次再去的, 不過仲有好多間火鍋名店係我張清單之上, 睇黎短期內未可以翻兜到架啦 ~

六合夜市, 本人對夜市的興趣度確實越來越低, 但無可否認呢個夜市之規模真係幾大, 唔食野行下都幾唔錯架, 最估我唔到係 … 我竟然買左烏魚子呀 …

本來呢種算是幾老派的食材, (純個人意見, 本人爸爸係我小時很愛吃, 所以覺得烏魚子總係帶點懷舊的氣息.), 經過上次食過薄薄一片烤過的烏魚子, 配一份雜菇飯, 真係覺得好有驚喜, 好想自已試整呀 !  結果嘛 … 我都係忍唔住都買左份番 HK 呢 ~

Day 2 的早上, 我們特意來到離市中心較偏的鳳山西站, 吃了一個意料之外的美味早餐 !

我地真係冇諗過 高記早點 的蛋餅會咁好食架, 餅身較厚的蛋餅, 加上煎蛋、油條, 澆上特製洋蔥汁, 捲起就滿滿的一份, 份量頗大而且略帶油膩, 很可能半份已經足夠 !

呀 ! 唔好記得要配番米漿 或 豆漿喎 ! 正哦, 打緊呢篇之時我已經好想食多次啦 ~

高記早點 Facebook Page : https://www.facebook.com/kaobreakfast/

近期高雄的新景點 : 衛武營彩繪村 !

平常的彩繪壁畫大多只是一幅圍椚又或一道外牆, 在這裡則是非常壯觀的整橦樓房, 仲要不單止一橦, 而是多達十多橦呀 !

雖然壁畫數量不少, 但地點尚算集中, 不用走動太遠範圍都可以看得完, 走走拍拍要花至少 2 小時左右吧 ~

留意下, 很多張壁畫都以我最喜愛的海洋為主題的哦 ~

除了魚, 還有雀鳥呢 ~

彩繪村中的不同角落 ….

呢張 NT 500 好真實哦 ~

呢個書架壁畫, 可以算係呢個彩繪村的地標, 似乎人人都會在這裡自拍一番 ~

這次高雄之旅, 我回程航班被改早了, 結果趕不及吃午飯, 只能望著龍蝦相輕嘆 … 出發前特地跟餐廳預訂的龍蝦, 卻吃不到了 ! 還好, 我還是帶走了一碗三味炙燒丼飯, 內有我最喜愛的比目魚側緣, 加三文魚及帶子, 剛好成為我的美味飛機餐 !

八十八丼 Facebook Page : https://www.facebook.com/88donburi/

訂了 2 隻龍蝦, 一隻用黎做蝦魚生丼, 一隻就咁烤左佢 …

高雄快閃之旅, 完成 !