已經係舊年的事情了 …
有次見朋友去完鹿巢石林, 影出黎的風景勁靚, 就約朋友們上山了 !
其實鹿巢石林並唔遠, 就係由大水坑入梅子林, 抄山徑登山而上, 路途說易也不容易, 但難也不算太難的 …
呢度的樹枝群間中會暗藏攻擊武器, 枝節上有勁尖又巨型的刺, 驚死唔拮中人咁 ! 好在我地好快就通過上到半山開揚位置, 剛好可以影張 Profile Pic !
呢度望番落去就係梅子林, 遠處則是城門河方向 ~
接著穿過草叢、竹林、樹林以及古村遺址 …
經過呢舊石頭時, 我地覺得好似一個猶長頭, 頭上有嗰頂羽毛帽咁, 就改左佢個名叫猶長石 !
黎到呢度, 就係上鹿巢石林的入口了 !!
攀上了石群之上, 眼前豁然開朗起來, 果然真真一大片廣濶石林就在眼前, 非常壯觀, 震撼感 100 分架 !
喺石林中攀爬很需要體力, 身體要盡力伸展, 手腳並用, 以唔同的肌肉去掌握平衡, 以越過一道道大小不一的石縫 ! 山友們在這裡行進, 真係要打醒十二分精神, 小心唔好叉錯腳, 先唔好講會唔會跌落石縫, 單單扭到腳都有夠麻煩的了, 搵人黎救都唔會易囉 ~~
係咪好正呢, 石林之風景 !! ?!
怪石嶙峋, 充滿想像之空間 … 誰想到走了那麼遠 !
坐在一角小休, 吃了點小食, 發了一會呆, 呢度真係一個好值得再探索的景點 !
石林中間過場有一個小叢林, 只要再攀升多一點, 就會去到石林頂了 !
呢度有個小難關要過, 大家要量力而為, 因為要靠臂力攀上石, 而下方是個頗深之石洞, 如果唔夠力真係會跌落去而受傷的 !
登上山頂後, 遇上了怪石與芒草, 卻也是想頗為沉悶的尋找之路 ~~
蜥蝪石登場了 …
遠看有點似, 近看就更似了, 不枉我地在山頭中打轉甘去搵啦 !
還有前方如鱷魚頭, 後邊則是人接人排影相的龍船石 !
回程期間我地有繞道走茅坪古道, 不過最近我又去左一次, 又影左另一批靚相, 咁就諗住將兩者夾埋一齊, 另出一篇遊記來分享啦 !!
回程係可以番去大水坑, 覺得唔夠哩數, 我仲行番出去沙田添 !
