明明過去 3 年冇出門, 理應可以清下積存的遊記, 結果唔好講話外國遊記, 就連本地遊記我都冇乜動力去寫齊 …
事隔 3 年再次分享的遊記, 已服常(亂飛)的我決定先講下澳門, 因為 … 自駕過去真係好方便, 結果由 4 月至今我都去左 3 次啦 ~ 點樣去安排自駕就唔多講了, 但開車過大橋確實係幾爽的 ….
久違了的澳門, 起點始於港珠澳大橋澳門口岸, 再轉坐架巴士入市區 !
第一站係朋友介紹的 368 (小食) 魚湯粉 , 呢度的魚湯粉真係幾好味, 個湯底真係唔錯, 不過如果要講味道更出色, 我會推介更愛的緬甸撈麵 !
368 (小食) 魚湯粉
仙台店 : 澳門巴波沙大馬路216號吉祥閣地下
路過澳門街頭風景 …
閒逛到望廈炮台 …
無意中找到間非常不錯 Cafe : Mind Cafe, 喺呢度飲到杯好有驚喜的 Dirty, 有層次有味道, 會係令人想再回頭的 Cafe, 而事實上我已經再去幫襯過了 ~
睇相嗰杯靚靚的係 <勿忘初衷> Espresso Tonic, 賣相靚之餘飲落都幾 refreshing 架, 只不過有比較就會覺得 Dirty 更出色一點咁啫 !
Mind Cafe
僑樂新街10號地下AB鋪
接著坐車去新濠鋒酒店, 諗住試下帝影樓的點心, 結果 大失所望 ….
或許午市唔係佢地的主打啦, 所謂的點心真係貴得黎平平無奇, 最令人無語係你夠膽收我百幾蚊開壺龍井, 仲要扮晒搵專人泡茶, 頂你嚟到壼茶淡到滾水咁, 唔識泡茶就唔好搞咁多嘢, 求其收番貴 D 個普通茶位算啦 !
食完只覺得浪費時間, 浪費 Quota, 唔會有下次 !!
今回重遊澳門唔想趕, 那就決定住番一晚, 我唔太喜愛氹仔嗰邊的新酒店, 反而想住番喺十六蒲的索菲特酒店 (Sofitel Macau at Ponte 16) !
唔介意俾多少少錢, 入住 Exclusive Club Millésime 房間, 可以免卻樓下排隊的麻煩, 直上 17 樓專人 check in, 就得啱時間仲可以喺 17 樓的專用餐廳, 享用番一頓免費的 Afternoon Tea 添呀 ~
是日晚飯係朋友介紹下, 仲即場幫我訂埋位的泰國菜 : Naam @ Grand Lapa ~
值得一試的原因係餐廳環境唔錯, 店員服務態度喺澳門嚟講算唔錯, 食物賣相味道都真係幾得, 最愛佢的芒果糯米飯, 好好食 !
最重要係米子蓮推介下都價格合理, 性價比算唔錯的 !!
Naam @ Grand Lapa
澳門友誼大馬路金麗華酒店地下
夜遊澳門, 拍下不常見到的澳門夜景 ~
如果想看不一樣的夜景, 可考慮一登東望洋炮台, 炮台晚上是不開放的, 但所處的松山公園卻是開放, 因此吃飽後來散散步也不錯 !
飯後用走的來橫越澳門, 倒是個不錯的路線, 去過了東望洋炮台, 再走經了瘋堂斜巷 …
入夜後的瘋堂斜巷倒有點歐洲氣息, 人流不多亦是打卡好時機 ~
最後一站走過了晚上清清靜靜的大三巴 …
是日最後一站, 很久没幫襯的小販檔 : 勤記甜品 !
糖水依然熱賣, 11 點多已經賣得 77 88, 別無選擇下要了紅豆沙, 卻是久違真材實料入口的香甜 ~~
好想食番佢的芝麻糊加湯丸哦 ……..
