漂泊中的魚

我雖然時常往外闖, 但係對 HK 的景點仲係非常有興趣架 !

本星期實在太熱啦, 未係好去到行山, 咁我地去大埔扮下偽文青啦 ~

不過要去尋訪散在大埔墟範圍內的法定古蹟, 當然要先吃早餐, 來一份新明發盅頭飯, 再加一粒燒賣, 正呀 ~

 

想去呢度好耐 – 舊大埔警署, 如今多了個別名綠匯學苑 (Green Hub).

呢間警署係新界首間永久警署, 建於 1899 年, 期間隨著時代變遷, 其警務用途亦有所不同, 直到 1987 才停止運作.

之後於2009年被評為一級歷史建築, 並於 2010 年被活化成「綠匯學苑」!

我認我係對英式舊建築特別喜愛架, 因為我就係鍾意用紅磚頭砌出黎的樓房 ~

綠匯學苑 (舊大埔警署) 網頁 : http://www.greenhub.hk/

 

呢度雖然對公眾開放, 但入內參觀前要先到接待室登記, 先可以四圍逛架 !

其實呢度有導賞團架, 係要提早預約的, 我没有於到訪前聯絡, 因此我地自己四處參觀好了.

 

我們先去逛後園位置, 如今已成為一個小庭園, 一座食堂 以及 收個工作坊.

呢度綠樹處處, 四處種植了香草, 感覺好舒服, 不過通風不及主樓入口那邊.

 

 

這是主樓前草地, 可以遠眺大埔市中心.

 

要參觀展覽, 就得進入主樓.

無意間留意到呢度有住宿提供, 不過是低碳生活型式的, 亦即係房間內只有風扇, 没有冷氣的 !

如今大熱天時, 我諗我頂唔順, 何況隔離的 office 同 小店 係有冷氣, 咁咪熱上加熱囉 … …

 

呢度應該係報案室來的 …  因為張枱上邊有疑犯拼圖簿, 當然仲有枱上那座古董電話啦 !

 

呢張地圖解說緊新界之由來, 公仔都幾得意架 ~

 

呢度係正主房隔離的係槍房 … …

佢話道門開個咁細個窗口, 就係為左保安用途的 ~

 

槍房的正隔離, 竟煞就係羈留室, 一共有兩個床位咁大把 ?! 唔會咁少犯啩 !?

 

 

係就係好似簡陋咁, 但都係羈留啫, 仲要相對黎講好鬼光猛下喎 !

典型式監房, 廁所係埋度 … …

 

呢度有野玩架, 記得影埋張嘜頭相先好走呀 !!

我呢, 就影埋黎做 Profile pic 了 ~

咁大家又估下…. 我被寫下犯左咩罪呢 ?!

 

報案室內咩案件都有, 係新界就更係大小事件都可能關警察事 …

其中一樣, 應該就係呃秤問題.

呢度有個公秤, 咁大家仲識唔識用呢種秤呢 !?

 

離開前, 我地去埋 Co-op 店逛逛, 一邊係關於自家手作出品, 另一邊則有農產品及食品.

剛好農夫收割了一些收成, 我順道買了 3 個小型茄子, 佢地好靚好新鮮哦, 正好準備下回煮飯時用 ~~

 

第一回走到上這山頭, 估唔到舊警署旁的童軍總部, 都係一座法定古蹟黎架 ~

這座建於 1907 年的紅磚屋, 原為新界第一座民政大樓, 為北區理民府.

呢座建築物超靚, 分南北兩座單層式建築, 設有多座拱型遊廊.

原來童軍總會平日不開放供參觀, 要申請 又或 特定某些公眾開放日, 才可以參觀到室內, 我們這天也只能在外逛逛 …

 

 

我們見時間尚早, 決定多走一個景點, 一個我也介紹過的景點.

不過經過大埔墟, 就先去阿婆豆花那邊吃番碗凍豆花先啦 ~

之後於必經之路, 見到在街邊擺賣的老人家們, 隻檸檬又大又新鮮, 婆婆話 5 蚊就 5 蚊啦 !!

 

係呀 ! 今次我地又來到 香港鐵路博物館 !

上回來時 (http://traveling-fish.tixmart.org/2015/11/07/2015-mi-po/), 主座展覽館剛好在維修, 今回終於可以參覯同影相了.

對火車票的外觀, 真的没有太大印象了, 望多 2 眼, 咁鬼似以前歡樂天地 D 獎卷o既 ?!

 

 

呢度係火車站以前的 office, 都幾懷舊架喎 ~

不過 … 堆木櫃真係好靚喎, 到家下都咁實淨 !

 

戶外的火車仍在, 路軌仍在, 不過一切都不復再了 …

時代不同, 勢代也不同 !

 

難得來到, 怎也要再逛一回火車車廂的了 …

每一回走上車卡, 我都會想起小時候唯一一次坐北上火車的回憶, 詳細內容不太記得, 只依稀記得那不安以及人山人海的震撼 ~

 

呵呵 … 同行友人們很交到戲哦 ~~

 

原來呢度收埋左一個火車模型, 是我從小到大都很想砌一個的實景模型哦.

只要按了掣, 火車就會自動行駛及停站, 幾開心呀 ~~

 

離開香港鐵路博物館, 見到一間很有型的涼茶店 : 三樂涼茶

我冇記錯, 佢應該係某大學士多都同佢入貨的涼茶店.

又一家香港小店, 默默在一角努力著, 今回我未能幫襯, 下回一定要試下 !

 

行下行下, 來到大埔超級廣場, 係囉 … 我要買埋餸先番屋企囉 ~

我雖然愛玩, 但每個月一定有至少一個 Weekend 留番同好友們 及 其小孩們 (咁當然仲有我那 3 個契女啦 !) 聚餐的.

要知邊係 HK 搵個可以容納一圍大, 半圍小朋友的地方並不易, 何況我家留下仲有游池, 天氣熱仲可以一齊落去游水嘛 ~~

不過我想講的係, 第一回知道呢度有隻大聾貓, 佢個 Backpack 好得呀 !!

可惜, 天氣明明好好架, 點知一買完餸, 落大雨落到 … … 好在我正準備回家, 但其實可唔可以遲少少架啫, 個個星期都要淋濕我 !?