呢日我終於有勇氣走去銅鑼灣啦, 番黎咁耐都冇正式踏足過的"鬧市" 呀 !! 11 點左右去到, 時間幾好, 可以唔洗排隊咁去"榮記"食車仔麵 , 入到去先知佢都係o岩o岩開門, 坐底望住佢張好複雜的 Menu, 我真係用左一些時間先可以睇明白佢的標價, 不過唔理啦, 我地各自叫左個四餸的面, 最好笑係寫單的阿姐, 佢好似未訓醒咁, 重覆我地叫的麵底同餸, 係可以一樣都唔o岩架, 開頭我以為係我講得唔清楚啦, 後來睇見隔望枱同佢拗上錯野時, 先知唔係講個有問題, 係聽o個個先係 …… 另外我地仲叫左菜同支裝忌廉, 嘩 ! 咁就搞掂一餐啦 ~
其實呢日黎銅鑼灣的主要目的, 係要番 UK 前買齊野, 番工衫啦, 鞋啦, 書啦 …etc, 總之係 Shopping 啦 ! 我地由皇室, LCX, Sogo, Sogo 後街, 世貿, Time Sq 到利園都去晒, 走走行左 9 個幾 hrs !! 中間當然有 break 下啦, 我地有去 Sogo 後街度檔雞旦仔度幫襯下, 又有去世貿的 MIX 度飲果汁 tea 一 tea, 唔係點可以捱咁耐呀 ~
除左係銅鑼灣, 中間我地都坐左"叮叮"去灣仔電腦城, 去探細佬班兼踩場, 去到時竟然發現o個附近都唔少食店架喎, 其中一間 "雞旦仔" 仲要係大排長籠添, 佢一底叫價 11 蚊喎 (上晝係買o個底都只係 5 蚊咋!), 為左試佢有幾特別, 即使已經食過一底, 我地都有排隊買黎試, 1 格仔餅, 1 雞旦仔, 雞旦仔確實係比 5 蚊底好食, 即叫即整, 幾煙韌咁, 但係格仔餅就嫌佢太脆左 d, 冇左鬆鬆軟軟的感覺, 同埋中間餡料少得滯. 呢間食店同時有賣牛什, 不過我之前已經食左啦, 所以冇試到, 但都見到唔少人幫襯的 ~
