下山後, 慢慢重回 Queenstown 方向, 駛到附近的 Kawarau Bungy Centre, 不過我地唔係去做笨豬, 而只係去睇人跳. (我乜都會玩, 但就係唔玩笨豬跳 !!) 跟據我以往的慣例, 就算我自己冇份玩, 睇人地玩都會照樣叫埋一份的, 結果咪又係我企o係 Platform, 乜鬼人跳落去我都叫番一餐, 最後仲興奮到忍唔住要送阿 Pooh 上場添 …. (由於場面殘忍, 就唔放相片上啦 ~ 呵呵 !!)
唔講唔知, 呢條俾人用黎做笨豬跳 Platform 的橋, 建於 1880 年, 都真係好大年紀架啦, 真唔敢想像當初點會有人選條咁舊的橋黎玩笨豬架 !? 不過亦都因為此地乃笨豬跳發源地, 從此就成為 NZ 名勝之一, 睇下我地都慕名而黎, 齋睇人跳就知啦 ~
P.S. 佢呢個 Bungy Centre 裝修好新, 2004 年先開幕, 成個酒店大堂咁, 幾靚架, 做笨豬前都要先去 check in, 順手可以去 shop 度睇下 ~
回到 Queenstown, 時間尚早, 咁不如上山走一趟睇風景啦 !! 我地先坐 Skyline Gondola 上山頂, 架 Gondola 成架海洋公園的登山纜車咁架, 唔明佢同威尼斯的有咩關係喎 ?! 話時話, 佢舊版紅色版, 成個貝類咁幾 cute 架喎 ~
上到黎真係不得了啦, 風景靚到不得了啦, 真係值得走上黎一趟架, 唔為咩, 只為呢個靚景 !! 呢個山頂中心冇乜特別野可做, 餐廳亦只係 Canteen 形式, 所以上到黎只要 focus 係個風景就可以了 ! 山頂唯一活動係玩 Luge (um..似滑輪車咁啦), 要再坐滑雪吊車上多一重山, then 沿跑道坐滑車滑到山頂纜車站, 可惜我眼見幾歲小朋友都玩緊, 難度刺激度有幾多可想而知, 算吧啦 ~ (不過冬天如果可以玩雪橇車就應該好正啦, 之前玩過幾次, 速度快好多架 ~~)
