上星期放左 4 日假, 結果行足 3 次山, 繼 HK : 夜行柏架山 之後, 我地玩左一回港島縱走, 由淺水灣走到香港大學, 全程大約 21 公里, 一共可以 Kill 4 個標架 !!
是日集合點在淺水灣沙灘, 先行去南灣道之盡頭, 就會發現有個登山徑入口, 可接上往衛奕信徑 1 段的, 由呢度可以登上紫羅蘭 !
在登上山之際, 先可回望淺水灣之風景, 後可以遠眺大潭水塘 ~
是日第一枝標 : 紫羅蘭 (Violet Hill 436m)
落番山之後, 山徑會接上一個 3 岔路口, 我地係呢度多走了一個來回短線上另一山頭 (屬大潭郊遊徑), 可以找到不知名標高柱一枝, 而且呢度遠眺的維港兩岸風景相當不錯 !
衛奕信徑 1 段的尾站, 為陽明山莊, 也是我們的一個補給站 ~
完成補給繼續行去布力徑 (Black’s Link), 走進港島徑 4 段後不久, 會遇上相中那道泥黃色的石壁, 由這裡可攀上聶高信山 (Mount Nicholson) !
不過此山路不是指定路線, 上山斜度略顯陡峭, 少不了有一些要手腳並用的攀爬, 請各山友自行判斷是否應付得來, 也記得要量力而為, 我地一致認為呢條路有點雨水都唔應該上架啦 !
聶高信山上原來也有名物, 第二及三張相中乃面具石是也, 第四及五張相則是回望的鷹咀石 !
至於山下的風景, 則是深水灣 & 海洋公園 !
在面具石之下 … …
聶高信山頂, 設有一座外表古怪的發射站, 說起來還真有外太空機地的感覺, 同行朋友們突然在相中就被接走了 … XD
而在發射站內收埋左一支標高柱 ((Mount Nicholson, 430m) 架 !
下山呢條林中棧道, 真係幾靚架 ~~
小休片刻後, 我地係布力徑再接上金馬倫山 (Mount Cameron) ~
當登上了山上 view point, 方知這裡是欣賞跑馬地全景的好地方 !
回望聶高信山 …
在林中左穿右插間, 我地找到了是日第 4 支標高柱啦 (Mount Cameron, 439m) !
上山不易, 下山也有點難, 全程林中路, 還真被山路兩傍的樹枝 / 樹葉不停地攻擊呢, 十分慶幸每次都有穿壓力褲打底咋 ~~
好不容易我們滾回山下, 才剛接上平坦的港島徑之上, 可惜不甘沉悶的我們決定沿山而走, 放棄
繞路, 主動出擊, 爆住林咁衝往香港仔上水塘 … 接近尾段仲要間中拉住繩咁落埋個斜路 !
香港仔上水塘 (Aberdeen Upper Reservoir) …
跟著水塘道直奔灣仔峽, 冇諗到灣仔峽道遊樂場的小食亭, 可以給我們作補給, 魚蛋燒賣實在太吸引了吧 !
由甘道接白加道, 是很易走的石屎馬路, 路上會經過政務司司長公館, 還可以看到維港風景, 再經過白加道纜車站, 最後才登上山頂廣場 !
盧吉道不用多寫吧 ?! 單單我在這個 Blog 都介紹過好幾次了 !
走過了盧吉道, 可沿克頓道落龍虎山, 再接到香港大學 (The University of Hong Kong), 咁就完成了是日的大縱走了 !
晚飯在朋友推介的活一鮮, 魚生唔錯 (但唔建議要拼盤), 壽司一流, 燒物抵食夾大件, 價格又合理喎, 冇其他理由唔再去多次囉 … … 請大家要記得打電話預約呀, 唔係可能有排等架 ! !
活一鮮 Openrice Review : https://www.openrice.com/zh/hongkong/r-%E6%B4%BB%E4%B8%80%E9%AE%AE-%E8%A5%BF%E7%92%B0-%E6%97%A5%E6%9C%AC%E8%8F%9C-%E7%83%8F%E5%86%AC-r38012
