今日去 Chinese Supermarket, 主要係買料整呢個越南米卷的 ! (旦撻只係咁o岩同佢遇到 ~)
第一次食米卷, 係o係 Adelaide, Addison Rd o個間 Vietnam Restaurant. 佢的蔗蝦米卷非常好食 (其他野食都好好架 !! e.g. 越式煲仔飯) 價錢都唔算貴. 不過佢係 Out Of City, 冇車都幾難去到 ! 後期我係 HK 的 Rice paper 都食過, 味道都唔錯, 一樣要動手自己包的, 不過呢間野埋單都 OK 貴 !! So Far 到而家, Adelaide o個間係我食過最好食架 !!
其實整呢個米卷非常簡單, 係材料比較多, 加上我仲要整埋個汁, 所以 要多少少時間準備 !
食材一覽 : 有自制酸辣汁 + 米卷配料 !
酸辣青檸汁 : 入面有青檸, 小辣椒, Garlic, Ginger, 魚露 同 糖 (份量應自己的口味啦, 青檸我用左大約 5 個, 整左一小 Jar, 可以雪起留待以後用 !)
呢個汁用時可以加少少水, 令味道冇咁濃 !! (唔食得辣要小心辣椒 ~)
有多而又未開水的汁可以放入樽內, 存放一排 !
米卷 : 越南米紙, 生菜, 青瓜, 米粉 (我用左 texture 唔錯的 江門排粉), 芽菜, 札肉 同埋 泰國的 Sweet Basil Leave (呢個材料係十分重要, 佢帶到一種特別的香草味出黎 !!)
- 米粉要先煮熟, 跟住輕輕用水過一過河, 避免米粉太熱 !
- 芽菜要過一過滾水, 因為我本身唔太鍾意生芽菜的味, 但唔好煮過頭, 令芽菜"淋" 左唔爽口!
- 札肉切條, 落鑊煎香.
- Basil Leave 我係成紮買的, 只要葉, 唔要莖, 用水洗乾淨.
- 最後生菜撕成小塊, 青瓜切條.
- 所有材料就算準備好啦 !!
呢個就係米紙啦 ! 只要放入溫水輕輕燙幾下, 就會軟身, 跟住可以用黎包配料啦 !
所有配料俾我排好係一個碟上, Ok Sell 得架 !
將軟身米紙放碟上, 放上配料, 再淋少少酸辣汁, 跟住卷起包好 ! (切忌貪心, 唔係會包唔埋架!)
完成品 : 由於米紙濕左會透明. 所以睇到晒入面 d 料架 !
我發覺呢個米卷幾方便, 又見得下人, 所以打算係下個月, 同事們黎我度學煮 " Chinese Foods" 時, 可以例為菜式之一, 呢 d 咁 Salad 式的野, 應該會o岩佢地外國人的口味 !!
是日晚餐, 米卷再配上綠茶一壺 ! 哈, 都幾 Enjoy 架 !!